कांग्रेसका क्षेत्रीय प्रतिनिधि र सक्रिय सदस्य रहेकालाई दोलखा एमालेमा महत्वपूर्ण जिम्मेवारी

- bolichali

२३ माघ २०७८, आईतवार

कांग्रेस क्षेत्रीय प्रतिनिधि र सक्रिय सदस्य रहेका चरिकोट बजारका दुई प्रभावशाली व्यक्तीलाई दोलखा एमालेले बिभागीय प्रमुख र जिल्ला कमिटि सदस्य पदमा मनोनित गरेको छ ।

दोलखा कांग्रेसको गत असोजमा सम्पन्न जिल्ला अधिवेशनमा भीमेश्वर नगरपालिका वडा नं ३ बाट क्षेत्रीय प्रतिनिधि चुनिएर आएका रामदास श्रेष्ठले जेष्ठ कम्युनिष्ट मञ्चको संयोजकको भुमिका पाएका छन् ।

कांग्रेसका गत जिल्ला अधिवेशनमा वडा नं ३ बाट क्षेत्रीय प्रतिनिधि आएका उनले भीमेश्वर नगर अधिवेशन, प्रदेश सभा २ को क्षेत्रीय अधिवेशन र जिल्ला अधिवेशनमा मतदाताको हैसियतमा मतदान गरेका थिए । उनले प्रमुख अतिथि बनेर कांग्रेसको वडा अधिवेशन समेत उद्धाटन गरेका थिए । श्रेष्ठ एमालेको नगर अधिवेशनमा पुगेर भाषण गरी आफु एमालेमै रहेको सन्देश दिएपछि उनलाई एमालेले रातो कार्पेट बिछ्याएर पुन पार्टी फर्काएको हो । श्रेष्ठले दोलखा कांग्रेसबाट अहिले सम्म राजिनामा दिएका छैनन र उनलाई पार्टीले हटाएको समेत छैन् ।

चरिकोट बजारका अर्का प्रतिष्ठीत व्यवसायी दिनेश बस्नेत समेत एमाले जिल्ला कमिटि सदस्यमा मनोनित भएका छन् । शुक्रबार र शनिबार चरिकोटमा सम्पन्न जिल्ला कमिटि बैठक मार्फत मनोनित भएका १६ जना जिल्ला कमिटि सदस्य मध्ये बस्नेतको नाम १६ औं स्थानमा छ ।

भीमेश्वर नगरपालिका ७ का बस्नेत ११ बर्ष देखी कांग्रेसको सक्रिय सदस्य छन् । २०६७ सालमा सम्पन्न १२ औं महाधिवेशन अघि बस्नेतले कांग्रेसको सक्रिय सदस्य लिएका थिए । २०७२ मा सम्पन्न १३ औं र १४ औं महाधिवेशन अन्तर्गत गत असोजमा सम्पन्न जिल्ला अधिवेशन अघि बस्नेतको सक्रिय सदस्य नविकरण भएको थियो । कांग्रेसमा हरेक महाधिवेशन अघि क्रियाशिल÷सक्रिय सदस्य नविकरण वा नयाँ लिन पाउने प्रचलन हुन्छ ।

बस्नेतको सक्रिय सदस्यता बारे दोलखा कांग्रेसमा पटक पटक बिषय उठ्दा भीमेश्वर नगरका मेयर पदका प्रत्याशी एवं प्रभावशाली नेता ईश्वर मानन्धरले बस्नेतले आफैंले राजीखुसीमा सक्रिय सदस्य नविकरण गरेको र उनी कांग्रेस नै रहेको स्पष्टीकरण दिने गरेका थिए ।

एमाले जिल्ला कमिटि सदस्य मनोनित भएपछि आईतबार सातदोबाटो चोक स्थित उनकै होटलमा भेटिएका बस्नेतले आफु यस अघि कांग्रेस सदस्य नरहेको जिकिर गरे । ‘मैले मेरो हस्ताक्षरले कांग्रेसको सदस्यता नविकरण त के भरेको पनि छैन, म कांग्रेसको सक्रिय सदस्य छदा पनि छैन’ उनले स्पष्ट पार्दै भने– ‘कसैले भरिदिएको रहेछ भने मलाई जानकारी बिषय हैन, म एमाले नै हुँ, एमालेको सक्रिय राजनितिमा होमिसकेको छु’ ।

कांग्रेस जिल्ला सभापति बर्मा लामाले बस्नेत र श्रेष्ठको कांग्रेस रेकर्डमा नाम रहेको र उनिहरु बारे अध्ययन गरेर कार्बाही गरिने सुनाए । ‘उहाँहरुको नाम हाम्रो रेकर्डमा ताजै छ, त्यो उहाँहरुकै मर्जीमा भएको हो’ उनले भने – ‘यसरी दोहोरो रुपमा दुई ओटा पार्टीमा नाम लेखाएर काम गर्ने साथीहरुको बिषयमा छानविन गरी कार्बाही गर्छौ’ ।

दोलखा एमालेका उपाध्यक्ष एवं पार्टी प्रवक्ता राजेन्द्र मानन्धरले बस्नेत र श्रेष्ठ बारे पार्टी स्पष्ट भएरै निर्णय गरेको सुनाए । ‘हिजो उहाँहरुको कता हुनुहुन्थ्यो वा हिजोको परिस्थिती के थियो थाहा छैन’ उनले भने – ‘तर आज उहाँहरु दोलखा एमालेको ईमान्दार कमरेड हो, काम गर्न चाहने साथीहरुलाई एमालेले जिम्मेवारी सहित ढोका खुला गर्ने गरेको छ ’ ।