दोलखाली खेल क्षेत्रमा फड्को- ‘भीमेश्वर कभर्डहल’

हिमाली जिल्ला दोलखामा पहिलोपटक सुविधासम्पन्न बहुउद्देश्यीय कभर्ड हल बन्ने भएको छ । हल निर्माणका लागि संरचना बनाउने कार्य अन्तिम चरणामा पुगेको छ ।

जिल्लामा खेल क्षेत्रको विकासमा नयाँ आयाम थप्ने उद्देश्यका साथ भीमेश्वर नगरपालिका वडा नम्बर–३ चरिकोट स्थित गौरशंकर क्याम्पस नजिकैको जग्गामा सुविधासम्पन्न कभर्डहल निर्माण भईरहेको छ ।

तिन बर्ष अघि भीमेश्वर नगरपालिकाले कभर्डहल निर्माणका लागि एक करोड विनियोजन गरेसंगै कभर्ड हल निर्माणको काम शुरु भएको थियो । उक्त पहिलो बर्षमा डिपीआर तयार पारिएको छ। सोही बर्ष टेन्डर आव्हान गरेर कभर्ड हल निर्माणको काम सुरु गरिएको भीमेश्वर नगरपालिकाका प्रमुख प्रशासकीय अधिकृत मानबहादुर खड्काले जानकारी दिए । कभर्ड हलको लागत करिब साढे १० करोड रुपैंया छ । कभर्ड हल भित्र ईनडुओर भलिबल, ब्याडमिन्टन, टेवलटेनिस, कराते, जमेस्टिक, उसु सहितका खेल खेल्न मिल्नेछ । यि सबै खेल खेल्न मिल्ने गरि संरचना तयार हुनेछ । यस्तै बाथरुम, ट्वाईलेट, मेडिकल रुम अफिस रुम जस्ता संरचना कभर्ड हलमा तयार हुनेछन । अपांगमैत्री कभर्डहलमा ३२.४ मिटर लम्बाई र २३.४ मिटर चौडाईको खेल मैदान बन्ने खड्काले जानकारी दिए ।

भीमेश्वर नगरपालिकाको कार्यालय छेवैमा गौरीशंकर क्याम्पसको जग्गामा करिव पाँच रोपनी जग्गामा बन्न लागेको कभर्डहलले भीमेश्वर संगै दोलखा जिल्लाको खेलकुद क्षेत्रको विकाससमा कायापलट हुने खड्काले बताए । ‘यो भीमेश्वर नगरपालिकाको एउटा सान प्रोजेक्ट हो’ उनले भने ।