गृह गाउँबाट उम्मेद्धारी घोषणा गर्दै श्रेष्ठले भने – ‘दोलखामा एमालेलाई एक नम्बर पार्टी बनाउछु’

नेकपा एमाले दोलखाका उपाध्यक्ष नरबहादुर श्रेष्ठले गृह गाउँपालिकाबाट नेकपा एमालेको आसन्न जिल्ला अधिवेशनमा अध्यक्षको उम्मेद्धारी घोषणा गरेका छन् । 

मंगलबार गृह गाउँ भेड्पुमा आफ्नै गाउँपालिका कमिटिको बैठक मार्फत श्रेष्ठले आसन्न्न एमाले अधिवेशनमा पार्टी अध्यक्षको उम्मेद्धारी घोषणा गरेका हुन् । उनी सोही गाउँपालिकाका अध्यक्ष समेत हुन् । 
‘आजको १० दिन पछि पार्टी जिल्ला अधिवेशन हुदैछ’ बैठकलाई सम्बोधन गर्दै श्रेष्ठले भने – ‘एमालेलाई दोलखाको एक नम्बर पार्टी बनाउने उद्धोष सहित आफ्नै जन्मभुमीबाट जिल्ला पार्टी अध्यक्षको उम्मेद्धारी घोषणा गर्दछु’ । उनले आफु अध्यक्ष भएपछि गर्ने कामहरुको खाका समेत सुनाएका थिए । 

‘दोलखा एमालेलाई संस्थागत सुधार सहित पार्टी भित्र बैचारिक नेताहरु तयार गर्दै जाने मेरो लक्ष्य हुनेछ’ उनले भने  । श्रेष्ठले आफु अध्यक्ष भएपछि हरेक स्थानिय तहमा कार्यकर्ता कल्याणकारी कोष स्थापना गर्ने र उक्त कोष मार्फत कार्यकर्तालाई परेको अफ्ठेरो र विपत्तीमा सहयोग गर्ने आफ्नो योजना रहेको सुनाए ।

पालिकाका नेताहरुको शुभकामना
श्रेष्ठलाई पालिकाका जिल्ला स्तरिय नेताहरुले शुभकामना दिएका छन् । एमालेको जिल्ला कमिटिमा प्रभाव राख्ने मेलुङ गाउँपालिकाका नेताहरु धर्मेन्द्र मोक्तान, विदुर शर्मा, गायत्री आचार्य, शिवहरी थापा, पालिका ईन्चार्ज एवं जिल्ला सचिवालय सदस्य हिरा थोकरले श्रेष्ठलाई शुभकामना दिएका थिए ।

पालिका भित्रको आन्तरिक पार्टी विवादका कारण कुनै समय सम्बन्ध नरहेका आफ्नै गाउँपालिकाका नेताहरु उनकै पक्षमा उभिएको एक सदस्यले सुनाए । जिल्ला नेता शर्मा सहितका नेताहरुले श्रेष्ठको आफ्नै जन्मभुमीबाटछ उम्मेद्धारी घोषणा भएको तस्विर सहित सामाजिक सञ्जालमा पोष्ट गरेका छन् ।

सचिवमा थोकरको घोषणा
यसै बिच सोही बैठक मार्फत जिल्ला सचिवालय सदस्य हिरा थोकरले एमाले जिल्ला अधिवेशनमा सचिव पदमा उम्मेद्धारी दिने घोषणा गरेका छन् ।

दोलखा एमालेमा अधिवेशन नजिकिदै जादा सरगर्मी बढेको छ । श्रेष्ठ संगै नेताहरु भरत केसी, भरत दुलाल, डबल पाण्डेले समेत जिल्ला अध्यक्ष पदमा आकाँक्षा राख्दै उम्मेद्धारी दिने तयारी गरेका छन् । औपचारिक रुपमा अध्यक्ष उम्मेद्धारी घोषणा गर्ने श्रेष्ठ भने पहिलो हुन् ।