‘उपाध्यक्ष मात्र हैन, एमालेबाट गाउँपालिका अध्यक्ष लड्न सक्ने हैसियत राख्दछु’

- bolichali

४ माघ २०७८, मंगलवार

नेकपा एमाले दोलखाकी जिल्ला कमिटि सदस्य सिता तामाङ वम्जनले आफु जन्मजातै एमाले रहेको र दोलखा एमालेमा १२ बर्ष सक्रिय रहेर योगदान गरेकाले आफ्नो राजनितिक ईमान्दारितामा शंका नगर्न आग्रह गरेकी छिन् । 

मंगलबार दिउसो बोलीचाली डटकम संगको फोन संवादमा सिताले वैत्येश्वर गाउँपालिकामा एमालेबाट आफुलाई आफ्नो श्रीमान संग जोडेर आसन्न स्थानिय चुनावमा उपाध्यक्ष पदको आकांक्षीको रुपमा चर्चा गरिएको भन्दै असन्तुष्टी जनाईन् ।  ‘उहाँ (श्रीमान्) को राजनितिक आस्था कांग्रेसमा छ, उहाँ कांग्रेसको नेता भईसक्नु भयो, त्यो उहाँको स्वतन्त्रता हो, म एमालेको नेता भईसके’ उनले भनिन् – ‘घरमा हामी श्रीमान श्रीमती हौं, बाहिर हाम्रो राजनितिक पृष्ठभुमी र संलग्नता फरक फरक छ’ । उनले आफु जन्मजात नै एमाले भएको दाबी गरिन् । ‘उहाँ र मेरो राजनितिक संलग्नता संग जोडेर टिकट बार्गेनिङ गर्न खोज्यो भन्ने आरोप सरासर झुठो हो’ उनले भनिन – ‘नचाहिने कुराको पछि नलाग्नुस, मेरो पार्टी एमालेमा म उपाध्यक्ष मात्र हैन, वैत्येश्वर गाउँपालिकाको अध्यक्ष दाबी गर्न सक्ने हैसियत राख्छु’ । 

पछिल्लो समय एमाले जिल्ला कमिटि सदस्य रहेकी सिता र कांग्रेस क्षेत्रीय सभापति रहेका उनका श्रीमान शुक्र तामाङका बारेमा प्रकाशित समाचार बिषयमा सिताले दिएको स्पष्टोक्ती उनकै भाषामा :

‘म रौतहटको चन्द्रनिगाहापुरमा जन्मिएं । हाम्रो परिवार गैरीमुदीबाटै चन्द्रनिगाहापुर झरेको हो । बुबा राजनितिक परिवारकै हुनुहुन्थ्यो । नेकपा एमालेमा सक्रिय उहाँको उठबस माधव कुमार नेपाल संग थियो । चपुर आसपासमा हुने माधव नेपालका हरेक भाषण सभा, पछि हाम्रो घरमा भोज भतेर हुन्थे ।  माधव नेपाललाई म सानै देखी अंकल भन्थे । 

बुबा एमालेको कडा कार्यकर्ता हुनुहुन्थ्यो । त्यसैले हामी पनि जन्मजातै एमाले । म पनि स्कुले उमेर देखी नै चपुरमा अखिलमा काम गर्दै आएं । २०६१÷६२ तिरको स्ववियु चुनावमा अखिलबाट स्ववियुमा लडें पनि । तर चुनाव चाही झिनो मतले हारें । 

 २०६४ सालमा शुक्र तामाङ संग बिहे भयो । उहाँ जेलमा हुनुहुन्थ्यो । त्यो अवधीमा मैले धेरै नै संघर्ष गर्नुप¥यो । टाढाको जेलमा पठाउने कारण उहाँलाई दोलखाकै कारागारमा सरुवाका लागी माधव नेपाल संग कुरा गरें । हालका राष्ट्रपति बिद्यादेवी भण्डारी रक्षामन्त्री हुनुहुन्थ्यो । माधव नेपाल हुँदै उहाँकोमा समेत कुरा पु¥याएं । रौतहटका नेताले शुक्र संग डिभोर्स गर्नु भने । म बिरक्तीएर फर्किएं । त्यही बेला धर्मेन्द्र मोक्तान मार्फत दोलखा एमालेका अध्यक्ष पार्वत गुरुङ संग भेट भयो । गुरुङलाई जेल सरुवा गरिदिनुस दोलखा एमालेलाई गुन लगाउछु भनेको थिएं । नभन्दै सरुवा भयो । 
२०७० सालको चुनावमा गुरुङ नै दोलखा १ बाट चुनाव लड्नु भयो । जेल गएर मैले पतिलाई ‘कन्भेन्स’ गरें । उहाँ कन्भेन्स हुनुभयो । पछि हामीले गैरीमुदीमा रातभरी विपक्षी संग लडेर एमालेलाई सहयोग पु¥यायौं । त्यस यता दोलखा एमालेमा निरन्तर सक्रिय छु । 

म जहिल्यै एमालेलाई भोट हाल्छु । श्रीमान २०४६ साल देखीकै खाँटी कांग्रेस । कांग्रेस प्रति उहाँको लगाव र आस्था अटुट छ । गत अधिवेशनबाट क्षेत्रीय सभापति बन्नुभयो । बच्चाहरु हुर्किदै थिए । श्रीमान समक्ष मैले पनि आफ्नो दलबाट सक्रिय राजनिति गर्ने प्रस्ताव गरें । उहाँले तिम्रो स्वतन्त्रता हो, ईच्छा लागेको गर भन्नु भयो । एमालेको जिल्ला अधिवेशनमा जिल्ला कमिटि सदस्य पदमा उम्मेद्धारी दिएं । उम्मेद्धार बन्न ७ बर्ष नाघेको हुनुपर्छ, २५ दिन पुग्दैन भनेर धेरै डिस्टर्ब गर्न खोजियो । पैसाको खोलो बगाएको आरोप लगाईयो । कांग्रेस सभापतिकी श्रीमतीलाई किन जिताउने भनेर धेरै टर्चर दिईयो । मलाई अहिले पनि सोध्न मन छ ? मेरो चाही राजनितिक स्वतन्त्रता हुदैन र ?  

पढाईमा स्नातक सकेको छु । जिवनमा धेरै संघर्ष गरेको छु । बच्चाहरु जन्मेपछि पढाईलाई निरन्तरता दिन सकेको थिईन् । अब स्नातकोत्तर भर्ना हुने तयारी गर्दैछु । 

पति कांग्रेस क्षेत्रीय सभापति र म जिल्ला कमिटि सदस्य बनेको भन्दै हाम्रो परिवारलाई टिकट बार्गेनिङको आरोप लगाईएको छ । यो सरासर झुठो हो । त्यसरी आरोप लगाउनेहरुलाई भन्न चाहन्छु । म एमालेबाट वैत्येश्वर गाउँपालिकाको उपाध्यक्ष मात्र हैन, अध्यक्ष नै पाउन सक्ने हैसियत राख्दछु । 
घर भित्र श्रीमान र मेरो कहिल्यै पनि राजनितिक गफ हुदैन । म एमाले असाध्यै मन पराउछु । श्रीमान कांग्रेसबाटै चुनाव लड्नुभएछ भने पनि सुर्य चिन्हमै भोट हाल्छु ।